हङकङमा बस दुर्घटना, १९ जनाको मृत्यु

चीनको विशेष प्रशासनिक क्षेत्र हङकङमा शनिबार भएको डबल डेकर बस दुर्घटनामा कम्तिमा १९ जनाको मृत्यु भएको प्रहरीले जनाएको छ ।

शाटिनबाट ताईपोतर्फ हिँडेको बस ताइपोमा पुगेपछि भएको दुर्घटनामा १४ पुरुष ४  महिलाको घटनास्थलमा नै निधन भएको बताइएको छ । थप एक पुरुषको भने अस्पतालले ढिलो गरी मृत्यु भएको घोषणा गरेको च्यानल न्युज एसियाले उल्लेख गरेको छ । 

घटनामा ६३ पुरुष र ३ महिला घाइते भएको जनाइएको छ । उद्धारकर्मीले दुर्घटनामा क्षतिग्रस्त बसको माथिल्लो भाग काटेर बसमा फसेका अन्य यात्रुलाई घाइते अवस्थामा उद्धार गरी अस्पताल पठाएका छन् । घटनाको अनुसन्धान शुरु गरिएको छ ।

घाइतेलाई भेट्न हङकङका कार्यकारी प्रमुख लाम चेङ युएट ङोरले विरामीहरूलाई उपचार सेवा दिइराखिएको प्रिन्स अफ वेल्स अस्पताल पुगेका थिए । मृत्यु भएका र घाइते भएका अधिकांश बसको अपरडेकमा यात्रा गर्नेहरू रहेको हङकङ फायर डिपार्टमेन्टका चेन हिङ युले संवाददातालाई बताएका छन ।